Кога се зборува за електричните автомобили, едно од првите прашања е: „Колку километри може да помине со едно полнење?“ Производителите се натпреваруваат кој ќе понуди поголем досег, па веќе имаме модели со 500 или 600 километри автономија. Но прашањето е – дали во секојдневието навистина ни е потребен толку голем досег?

Реалноста на секојдневното возење

Анализите на возачките навики покажуваат дека просечниот возач користи само мал дел од вкупниот досег на возилото. Во просек, тоа се околу 12% од капацитетот на батеријата дневно. На пример, кај автомобил со досег од 350 километри, најчесто се возат само околу 40 километри на ден.

Кога ќе се споредат различни категории на возила, сликата е слична. Кај модели со помал досег од 100 километри се користи околу една петтина од вкупната автономија дневно. Кај возила со досег од околу 300 километри, просечната искористеност паѓа на околу 12%, а кај најголемите батерии од речиси 400 километри, дневната употреба е само околу 8%.

Дали досег од 200 километри е доволен?

Ако се земе предвид дека повеќето возачи во големите урбани центри вообичаено поминуваат 50 до 70 километри дневно, станува јасно дека автомобил со досег од 200 километри може да ги покрие речиси сите потреби. За македонски прилики, оваа бројка е и далеку помала. Со можност за редовно полнење дома или на работа, возачите речиси никогаш не би ја почувствувале потребата од батерија со двојно или тројно поголем капацитет.

Големите батерии носат и свои недостатоци. Тие го зголемуваат трошокот за купување, ја прават каросеријата потешка и ја намалуваат ефикасноста на возилото. Затоа, понекогаш помал досег значи попрактичен и поповолен автомобил.

Како се менува перцепцијата за досегот?

Интересно е што возачите кои веќе возат електричен автомобил со тек на време се чувствуваат многу посигурни во однос на досегот. Иако во почетокот може да постои грижа дека батеријата нема да биде доволна, со искуството таа загриженост брзо исчезнува. Возачите сфаќаат дека реалните потреби се далеку помали од она што првично го замислувале.

Заклучок

Иако голем досег изгледа како важна предност, податоците покажуваат дека за најголемиот дел од возачите тоа е непотребен луксуз. Автомобил со досег од околу 200 километри е повеќе од доволен за секојдневните рутини, а иднината на електричната мобилност најверојатно ќе се движи кон поефикасни и подостапни модели, наместо кон постојано зголемување на батериите.