Една од најчестите дилеми кога се купува електрично возило е: „А што кога ќе се расипе? Ќе чинат ли поправките многу?“ Според новата студија на аналитичката компанија CDK Global, трошоците за поправки и сервисирање на ЕВ во просек се пониски од оние на класичните бензински и дизел возила. Оваа студија, базирана на анкета меѓу илјадници возачи во САД, ги разгледува не само цените, туку и искуствата на корисниците со сервисите.
Повеќето ЕВ возачи пријавуваат пониски трошоци за одржување и поправки
Резултатите покажуваат дека 53% од сопствениците на електрични возила (освен Tesla) веруваат дека одржувањето им е поевтино од времето кога возеле бензинец или дизел. И кај Tesla сопствениците, дури 41% го делат истото мислење.
Овие бројки ја потврдуваат генералната предност на ЕВ технологијата. Помал број на подвижни компоненти, нема масло, нема менувач, нема свеќички, нема издувен систем… помалку компоненти значи помалку причини за расипување – и, секако, помали трошоци.
Помалку поправки, но не секогаш побрзо
Иако сервисните сметки кај EV се пониски, студијата открива дека времето поминато во сервис не е секогаш пократко. Само 28% од EV сопствениците успеале да завршат со сервисот во истиот ден, што е помалку од 40% во 2023 година.
Дополнително, 34% од сопствениците на EV (освен Tesla) и 23% од Tesla корисниците пријавиле дека поправките им траеле подолго отколку кога возеле конвенционални возила. Тоа може да се должи на недостиг од резервни делови или недоволна обученост на сервисниот кадар.
Нови форми на сервисирање – мобилен сервис и преземање од дома
Сè поголем број EV производители и сервисери нудат алтернативни решенија. Според CDK Global, 19% од возачите користеле мобилен сервис. Тоа значи дека техничар доаѓа на локација кај корисникот. Тоа е значителен раст во споредба со 14% во 2023 година.
Исто така, се повеќе сервиси нудат услуга за преземање и враќање на возилото. Тоа овозможува поправките да се извршуваат без сопственикот воопшто да оди во сервис.
Заклучок: одржувањето и поправките на ЕВ се навистина поевтини, но системот треба да се догради
Истражувањето на CDK Global покажува дека електричните возила нудат значителни заштеди кога станува збор за поправки и редовно одржување. За голем дел од возачите, ова претставува вистинска финансиска предност.
Сепак, предизвик останува достапноста на квалитетна и ефикасна сервисна инфраструктура, особено надвор од поголемите градови и во земји каде ЕВ пазарот сè уште расте. Потребна е дополнителна обука за сервисерите. Секако, потребно е и подобро снабдување со резервни делови за да се намали времето на чекање и да се избегнат повторни посети.
Во целина, електричните возила не само што се поеколошки и поекономични во секојдневното возење – туку и сè повеќе се покажуваат како поисплатлива инвестиција и на подолг рок. А тоа важи и за моментот кога ќе дојде ред за сервис.