По години на ветувања и тестирања, Tesla конечно го пушти во функција својот прв Роботакси сервис – и тоа во Остин, Тексас. Ова е историски чекор за компанијата и за светот на автономната мобилност. Услугата започнува скромно, но амбициозно: Тесла планира иднина во која такси автомобилите ќе се користат на повик и тоа: без возач, без волан, без педали.
Како изгледа Роботакси?
Во моментов, услугата функционира со Tesla Model 3 и Model Y, опремени со најновата верзија на Full Self-Driving (FSD) софтверот. Иако возилата самостојно управуваат, во оваа фаза во секој Роботакси има присутен безбедносен возач кој надгледува сè – но не управува со возилото, освен ако не е потребно.
Целта е ова присуство со време да се елиминира, и Роботакси да стане целосно автономна, достапна услуга преку Tesla апликацијата.
Колку чини едно возење со Роботакси?
Во Остин, Tesla го започна сервисот по цена од само 4.2 долари по возење, без разлика на дистанцата, што е значително поевтино од класичен Uber или Lyft. Според првите корисници, патувањето е тивко, мазно и импресивно – особено кога автомобилот самостојно се справува со семафори, раскрсници и пешаци.
Технологија зад системот
Tesla користи сопствена технологија, без класичните лидар сензори, која се потпира на 8 камери, автономни сензори и напредни неуронски мрежи. Сите возила се електрични, со нула емисии, и постојано се надградуваат преку софтверски ажурирања, што го прави системот побезбеден со секој изминат ден.
Веќе имаме неколку репортажи од искуства на патници, па погледнете како изгледа едно возење во целост:
Идни планови
Илон Маск најави дека на 8 август 2025 ќе биде претставен и целосно нов Роботакси дизајн – возило без волан, без педали, и дизајнирано од нула за автономна употреба. Ова би требало да ја отвори вратата за глобална експанзија на услугата, вклучувајќи и можни европски и азиски пазари.
Tesla уште еднаш ги поместува границите на мобилноста. Со Роботакси, не само што се менува начинот на патување, туку и целата парадигма на сопственост и транспорт. Ќе го видиме ли овој модел и во Европа? Времето ќе покаже.