Кога Ferrari ја претстави својата прва целосно електрична лимузина Luce, реакциите беа поделени. Ајде да речеме поделени, во најмала рака. 🙂 Голем дел од автомобилската јавност го критикуваше дизајнот, оценувајќи дека моделот значително отстапува од традиционалниот изглед по кој италијанскиот производител е препознатлив со децении. Но, само неколку недели подоцна, кинескиот пазар испрати сосема поинаква порака.
Сите 88 примероци од Ferrari Luce наменети за Кина беа распродадени речиси веднаш по почетокот на продажбата. Попрецизно, потребни биле 3 минути за целосна распродажба. Со цена од околу четири милиони јуани, односно приближно 586.000 американски долари, Luce не е автомобил што се купува импулсивно. Сепак, интересот беше доволен за целата почетна квота да најде сопственици за исклучително кратко време.
Дизајнот може да биде спорен, но логото на Ferrari сè уште има огромна тежина
Во последните недели на социјалните мрежи можеа да се прочитаат бројни критики за изгледот на Luce. Дел од љубителите сметаат дека автомобилот премногу се оддалечува од класичниот Ferrari, додека други го поздравуваат храбриот пристап кон новата електрична ера.
Но, продажните резултати покажуваат дека кај ултралуксузниот сегмент емоцијата и престижот често имаат поголема тежина од интернет-коментарите. Купувачите не го избираат Ferrari само поради бројките за забрзување, автономијата или дизајнот. Тие купуваат дел од историјата, ексклузивноста и статусот што брендот го градел повеќе од седум децении.
Кина останува клучен пазар и за најексклузивните производители
Интересно е што ова се случува токму во Кина – земја која денес произведува едни од најнапредните електрични автомобили во светот. Домашните брендови нудат модели со извонредни перформанси, современа технологија и значително пониски цени, но тоа не го намалува интересот за најпрестижните европски производители.
Ferrari очигледно успева да ја задржи својата аура и во време кога електрификацијата ги менува правилата на играта. Успешната продажба на Luce покажува дека за одредена категорија купувачи, легендарното жолто коњче на хаубата останува симбол што не може лесно да се замени.
Што значи ова за иднината на електричните суперавтомобили?
Брзата распродажба на Ferrari Luce е потсетник дека пазарот на електрични автомобили не е составен само од рационални одлуки. Во сегментот на луксузните автомобили, имиџот, традицијата и ексклузивноста остануваат пресудни фактори.
Тоа не значи дека Luce ќе стане комерцијален хит во масовни бројки, ниту дека критиките за неговиот дизајн ќе исчезнат. Но, покажува дека Ferrari успеа да направи најважниот прв чекор – да докаже дека и првиот целосно електричен модел на брендот има публика подготвена веднаш да го прифати.
Во време кога многумина предвидуваа дека електричниот Ferrari ќе биде пречекан со воздржаност, кинеските купувачи испратија јасна порака: кога станува збор за Ferrari, легендата сè уште има моќ да продава.