Низ улиците на центарот на Скопје деновиве можеше да се забележи вистинска реткост – Xiaomi SU7 Max, електричен седан кој сè уште не е официјално достапен на европските пазари. Нашите камери го „уловија“ овој впечатлив модел со албански регистарски таблички на ул. Максим Горки во Центар. Тоа отвора интересна приказна за тоа како ваков автомобил веќе се вози во регионот.

Xiaomi SU7 Max – кинескиот одговор на Tesla и Porsche

Xiaomi, компанијата позната по смартфони и технологија, со моделот SU7 направи сериозен влез во автомобилската индустрија. Верзијата Max претставува врв во понудата. Импресивни перформанси, напредна софтверска интеграција и дизајн кој лесно се мери со најатрактивните електрични седани на пазарот.

Со забрзување од 0 до 100 km/h за околу 2.8 секунди и моќност ид 673 коњски сили, SU7 Max не е само „гаджет на тркала“, туку вистински перформансен автомобил. Батеријата и архитектурата овозможуваат и брзо полнење, што го прави практичен за подолги патувања – како, на пример, од Албанија до Скопје. Досегот на овој модел е над 650 км, со батерија од 101 kWh.

Како е можно да се вози во регионот?

Она што ја прави оваа приказна особено интересна е фактот дека моделот е наменет за кинескиот пазар. Во повеќето европски земји, вклучително и Македонија, вакви возила не можат да се увезат, хомологираат и регистрираат.

Сепак, ситуацијата во Албанија е пофлексибилна. Таму е дозволен увоз и регистрација на модели наменети за кинескиот пазар, што им овозможува на ентузијастите да бидат чекор пред остатокот од Европа кога станува збор за нови електрични технологии. Веќе постојат и неколку фирми – увозници и препродавачи на кинески модели во Албанија и Косово.

Токму затоа не е изненадување што овој Xiaomi SU7 Max доаѓа со албански таблички – и претставува вистинска атракција кога ќе се појави на улиците во Скопје.

Посета која привлекува внимание

Со својот впечатлив тиркизен финиш, минималистички дизајн и футуристички линии, SU7 Max буквално не можете само да го одминете. За многумина, ова беше прва можност во живо да видат автомобил од новата генерација кинески ЕВ модели кои сериозно ја менуваат играта на глобално ниво.

Ваквите „гости“ во Скопје не се само куриозитет – тие се најава за тоа што нè очекува во блиска иднина. Кинеските производители, предводени од технолошки гиганти како Xiaomi, брзо напредуваат и веќе нудат производи кои се конкурентни, па дури и супериорни во однос на западните брендови во одредени сегменти.

Што значи ова за Македонија?

Присуството на Xiaomi SU7 Max во Скопје отвора едно важно прашање – дали нашата регулатива е подготвена за новиот бран електрични возила?

Додека соседни пазари веќе дозволуваат поголема флексибилност, кај нас процесот на увоз и хомологација сè уште е ограничен. Но интересот кај купувачите расте, а ваквите примери само дополнително ја поттикнуваат љубопитноста.

Едно е сигурно – иднината на мобилноста веќе е тука. Понекогаш, таа доаѓа тивко и ненајавено… со албански таблички и многу коњски сили под педалата.